Que bonito é Berlim!
Levo vários dias a escuitar a ediçom publicada pola Regueifa do livro da Maria Lado, Berlim.
Este primeiro 'audiobook' da netlabel, oferece-nos a possibilidade, a mais que recomendável e interessante possibilidade, de escuitarmos a voz da Maria Lado a recital os seus versos com a música de Fanny+Alexander, composta especialmente para a ocasom.
Para além de podermos escuitar, também podemos descarregar-nos, de balde, o livro em Pdf., cousa que ajudará em muito à distribuiçom deste livro, editado, até onde eu sei, polo Correo Galego há uns quantos messes, e que nom é nada fácil de conseguir.
A sua escuita, a sua leitura, é umha pequena ilha agradável no meio dumha literatura tam pouco atractiva como a que nos rodeia. A voz da Maria, a música de Fanny+Alexander, transportam-nos, desde a distáncia ou a cercania, desde o sonho ou a consciência, desde a melancolia e as lembranças, às agradáveis e utópicas ruas, bares, lugares dumha Compostela que, em algum momento das nossas vidas, todos, todas, temos vivido. Sem complexos.
Sem complexos. Como di Mario Regueira na apresentaçom do livro: 'Ás veces unha voz de muller segue a subvertir papeis na poesía contemporánea, e consegue acadar centralidade para cantar á fatalidade e a tenrura do amor sen complexos'. Sem complexos.
Maria sigue, como desde a sua primeira visom, a surpreender-nos. Se queredes gozar com a palavra, com os versos, com a poesia, com a música,... dedicade uns minutos a baixar-vos Berlim, formato musical e pdf. Paga a pena!!!
TEXTO DE IGOR LUGRÍS
